Тоқаев Израильдің кнессет төрағасын қабылдады

Президент Қасым-Жомарт Тоқаев Израиль кнессетінің төрағасы Амир Охананы қабылдады, деп хабарлайды Orda.kz.

Қасым-Жомарт Тоқаевтың айтуынша, Израиль парламенті спикерінің Қазақстанға сапары қазақ-израиль қарым-қатынасының жақсарып келе жатқанын көрсетеді. Мемлекет басшысы екіжақты ынтымақтастықтың перспективасын қарастыру тұрғысынан бұл сапардың маңызды екенін атап өтті.

Кездесу барысында сауда-экономикалық серіктестікке ерекше назар аударылды. Сонымен қатар су ресурстары саласындағы ынтымақтастық мәселесі талқыланды. Қасым-Жомарт Тоқаев Израильде жасалған озық технологияларға жоғары баға беріп, еліміз бұл салада серіктестік орнатуға дайын екенін растады.

Еске салайық, 20 наурызда Қазақстан президенті Қасым-Жомарт Тоқаев пен Израиль президенті Ицхак Герцог телефон арқылы сөйлесті.