Тоқаев Гонконг әкімшілігінің басшысы Джон Лимен кездесті

Президент Қасым-Жомарт Тоқаев Қазақстанға алғаш рет келген Гонконг Арнаулы әкімшілік ауданы Әкімшілігінің Басшысы Джон Лимен кездесу өткізді, деп хабарлайды Orda.kz.

Ақорданың мәліметінше, Мемлекет басшысы бұл сапардың Қазақстан мен Гонконг арасындағы, сондай-ақ Қазақстан мен Қытай арасындағы ынтымақтастықты дамытуға жаңа серпін беретінін айтты.

«Елдеріміз арасында жоғары деңгейдегі саяси диалог қалыптасқан, сауда-экономикалық және инвестициялық ықпалдастық қарқынды дамып келеді. Гонконгпен қарым-қатынасымыз туралы да осылай айтуға болады»,  деді Президент. 

Қасым-Жомарт Тоқаев Гонконгтың инвестиция, инновация, технология және халықаралық сауда салаларындағы әлеуетіне тоқталып, оны әлемдегі жетекші қаржы және іскерлік орталықтардың бірі ретінде атады.

Президенттің пікірінше, Джон Лидің сапары өзара тиімді ынтымақтастықты күшейтіп, инвестиция, қаржы, цифрландыру, жасанды интеллект және көлік-логистика салаларындағы бірлескен жобаларды іске асыруға мүмкіндік береді.

Сондай-ақ Мемлекет басшысы Қазақстанға ірі бизнес-делегациямен келгені үшін Гонконг әкімшілігінің басшысына алғыс білдірді. Оның айтуынша, бұл Гонконг бизнес қауымдастығының Қазақстанмен әріптестікті кеңейтуге мүдделі екенін көрсетеді.
 
 Оқи отырыңыз: 

• Павлодар облысында «Газель» жаяу жүргіншілер жолында әйел мен баланы қағып кетті
   
  Қазақстанда «Әділет» партиясы ресми тіркелді