Тоқаев Дубайда 10 келісімге қол қойды

Қазақстан Президенті Қасым-Жомарт Тоқаев Дубайда өтіп жатқан COP 28 Дүниежүзілік климат саммиті аясында Қазақстанның және басқа елдердің мемлекеттік органдары мен бизнес құрылымдары арасындағы бірқатар келісімдерге қол қою рәсіміне қатысты, деп хабарлайды Orda.kz.

Мемлекет басшысының қатысуымен мынадай құжаттарға қол қойылды:

1.       Қазақстан Республикасы мен Біріккен Араб Әмірліктері арасындағы жел электр станциясы (1 ГВт) жобасын іске асыру туралы үкіметаралық келісім.

2. Қазақстан Республикасы Энергетика министрлігі, «Самұрық-Қазына» АҚ және Біріккен Араб Әмірліктерінің Инвестициялар министрлігі арасындағы Қазақстан аумағында жалпы қуаты 10 ГВт төмен көміртекті энергетиканы дамыту жөніндегі өзара түсіністік туралы меморандум. 

3. Qazaqstan Investment Corporation және ADQ арасындағы стратегиялық серіктестікте өзара түсіністік туралы меморандум.

4. Қазақстан Республикасы Үкіметі, «Актас Энерджи» ЖШС және «TotalEnergies» арасында «Жамбыл облысы Мирный ауылы аумағында 300 мегаватт/600 мегаватт-сағ аккумуляторлық энергия сақтау жүйесін пайдаланатын жалпы қуаты 1 ГВт жел электр станциясын әзірлеу, салу және пайдалану» туралы келісім.

5. «Самұрық-Қазына» АҚ мен «ACWA Power» арасындағы энергия сақтау жүйесі бар жалпы қуаты 1 ГВт жел электр станцияларын салу жобасын бірлесіп әзірлеу туралы келісім.

6. «Самұрық-Қазына» қоры мен «Presight.AI» арасындағы цифрландыру және ақпараттық технологиялар саласындағы жобаларды жүзеге асыру үшін бірлескен кәсіпорын құру туралы келісім.

7. «ҚазМұнайГаз» ҰК АҚ мен «AD Ports Group» арасындағы Қазақстанда кеме жөндеу және кеме жасау кәсіпорнын құру бойынша өзара түсіністік туралы келісім.

8. «Қазақстан темір жолы» ҰК» АҚ мен «Abu Dhabi Ports Group» арасындағы бірлескен кәсіпорын құру туралы келісім.

9. «Атамекен» АЭС, «SAFC» ЖШС және «SEFE Marketing & Trading» арасындағы орман климаты жобаларын іске асыру бойынша ынтымақтастық туралы меморандум.

10. «Қазатомөнеркәсіп» ҰАК» АҚ мен «Emirates Nuclear Energy Corporation» арасындағы табиғи уран концентраттарын жеткізу туралы келісім.

Сонымен қатар, Тоқаев БАӘ Инвестициялар министрі және ADQ холдингінің басқарушы директоры Мухаммед әл-Сувейдимен келіссөздер жүргізді.

Тараптар  бірлескен инвестициялық жобаларды жүзеге асыруға ерекше назар аударды.

Атап айтқанда, Қазақстанда жалпы қуаты 10 ГВт төмен көміртекті энергетиканы дамыту туралы Меморандумға, сондай-ақ Масдармен қуаты 1 ГВт жел электр станциясы жобасы бойынша Үкіметаралық келісімге қол қоюдың маңыздылығы атап өтілді. .

Тоқаевтың айтуынша, «AD Ports Group» компаниясымен тұрақты серіктестік Ақтау және Құрық порттарын Каспий теңізіндегі басты теңіз хабына айналдыруда маңызды рөл атқарады.

Сондай-ақ Мемлекет басшысы «ACWA Power» директорлар кеңесінің төрағасы Мухаммад Абунаянмен кездесті.

Тараптар  Жетісу өңірінде қуаттылығы 1 ГВт жел электр станциясын салу перспективаларын талқылады. Бұл нысанға салынатын инвестиция көлемі 1,8 миллиард доллар болады деп күтілуде.