Тоқаев Бурабайда ауызашар берді

Қасым-Жомарт Тоқаев Бурабайда өткен Ұлттық құрылтайдың төртінші отырысынан кейін ауызашар берді, деп хабарлайды Orda.kz.

Президенттің айтуынша, ислам – өзара құрмет пен келісім діні. 

«Кейбір санасыз, надан адамдардың, арандатушылардың іс-әрекетінің салдарынан әлемдегі ислам дінінің де беделі төмендеп кетті. Өкінішке қарай, осындай үрдіс пайда болды. Мұндай алмағайып кезде біз ынтымағымызды нығайтуымыз керек. Бұл – аса маңызды міндет. Бәріміз бір ел болып зор жауапкершілікпен мемлекеттік саясатты қолдауымыз керек, еліміздің ұлттық мүддесін қорғауымыз қажет», – деді Тоқаев.

Сонымен қатар, Тоқаев қасиетті Рамазан айы мен Көрісу күніне орай халықты құттықтады. Ол бұл екі маңызды оқиғаның қатар келуін жақсылықтың нышаны деп атады.

«Қасиетті Рамазан айы еліміз үшін жақсылыққа толы, шарапаты мол ай болсын. Оразада ниет еткен дұға-тілектеріңіз қабыл болсын. Еліміз аман, жұртымыз тыныш болсын», – деді мемлекет басшысы.