Тоқаев Башқұртстан басшысын қабылдады

Қасым-Жомарт Тоқаев Астана мен Мәскеудің екіжақты байланыстарын нығайтуға өңіраралық ықпалдастық елеулі үлес қосып отырғанын атап өтті.

Бұл туралы Ақорда хабарлайды.

«Қазақстан мен Ресей арасындағы жан-жақты қатынастарға тың серпін беру тұрғысынан алғанда бүгінгі сапарыңыздың мәні зор. Біз индустрия, агроөнеркәсіп кешені және гуманитарлық салалардағы байланыстарымызды әртараптандыру үшін барынша күш саламыз» деді мемлекет басшысы.

Президент бірқатар келісімнің, соның ішінде үкіметтер деңгейінде қол қойылған Ынтымақтастықтың 2023-2024 жылдарға арналған жол картасының табысты жүзеге асырылып жатқанына назар аударды.

Еске салайық, өткен аптада Башқұртстанда Баймак қаласында жергілікті белсенді Фаил Алсыновтың араздық тудырды деген айыппен сотына байланысты жаппай наразылық шерулері өткен болатын. Митингке қатысушылар Радий Хабировтың отставкаға кетуін де талап етті. Башқұртстан басшысы Алсыновты бейбіт қойшының атын жамылып жасырынған сатқын деп атады.