Тоқаев Астанадағы қаржы оталығы жанынан ШЫҰ кеңсесін ашуды ұсынды

Президент Қасым-Жомарт Тоқаев Астана қаласындағы Халықаралық қаржы орталығы базасында ШЫҰ кеңсесін құруды ұсынды, деп хабарлайды Orda.kz Ақордаға сілтеме жасап.

Мемлекет басшысының пікірінше, сауда-экономикалық және инвестициялық ынтымақтастықты арттыру аса маңызды. Осыған байланысты Қазақстан ШЫҰ-ның еркін және әділ халықаралық сауданы дамытуға бағытталған іс-қимылын қолдайды, санкциялық қысым құралдарын қолдануға қарсы.

«ШЫҰ құрылғаннан бері біздің елдердің әлемдік ЖІӨ-ге қосқан үлесі екі есеге артып, 30 пайызға жетті. Ішкі аймақтық сауда айтарлықтай өсім көрсетіп отыр, оның көлемі 2024 жылдың қорытындысы бойынша 650 миллиард доллардан асты. Қазақстанның ШЫҰ елдерімен тауар айналымы да тұрақты түрде өсіп келеді, өткен жылы оның көлемі 70 миллиард долларға жақындады», - деді Тоқаев. 

Сонымен қатар ол Қазақстан Қытайдың ШЫҰ Даму банкін құру туралы бастамасын қолдайтынын және осы перспективалы жобаны іске асыруға қатысуға дайын екенін де атап өтті. 

«Бұдан басқа, Астана халықаралық қаржы орталығы базасында ШЫҰ-ның перспективалы инвестициялық жобаларды сүйемелдеу және заңды, консалтингтік және қаржылық компаниялар қызметін шоғырландыру жөніндегі офисін құруды ұсынамыз», - деп ұсынды Қасым-Жомарт Тоқаев. 

Естеріңізге сала кетейік, 30 тамызда Қасым-Жомарт Тоқаев Шанхай ынтымақтастық ұйымының саммитіне қатысу үшін Қытайдың Тяньцзинь қаласына ұшып келген болатын. 

Сол күні ол ҚХР төрағасы Си Цзиньпинмен келіссөздер жүргізді. Көшбасшылар сауда-экономикалық, инвестициялық және мәдени-гуманитарлық байланыстарды нығайту жолдарын қарастырды.

Қытайда өткен Шанхай ынтымақтастық ұйымы (ШЫҰ) мемлекет басшылары кеңесінің отырысы барысында Қазақстан Президенті Қасым-Жомарт Тоқаевтың қатысуымен жиырма құжатқа қол қойылды.