Тоқаев ана мен бала өлімін азайтуды тапсырды

Қасым-Жомарт Тоқаев Денсаулық сақтау министрі Ақмарал Әлназарованы қабылдады, деп хабарлайды Ақорда.

Денсаулық сақтау министрі Ақмарал Әлназарова қазіргі уақытта өмір сүру ұзақтығы 75 жастан асқанын хабарлады. Жыл басынан бері 21-ші инфекция, оның ішінде коронавирус инфекциясы бойынша сырқаттанушылық көрсеткіштері төмендеді. Вакциналау және алдын алу шараларын жүргізу бойынша жұмыстар жалғасуда.

Оның айтуынша, медициналық қызмет сапасы мен қолжетімділігін арттыруға ерекше көңіл бөлінеді. Алғашқы және стационарлық медициналық көмек ұйымдастыру тәсілдері қайта қаралуда, диагностика және емдеу стандарттары жаңартылуда, саланың кадрлық әлеуеті нығайтылуда.

Сондай-ақ, дәрілік заттар мен медициналық бұйымдарды сатып алу жүйесінің тиімділігі мен ашықтығы қамтамасыз етіледі. Бұдан басқа, медициналық мекемелер жұмысының тиімділік деңгейін арттырады. Президентке Денсаулық сақтау инфрақұрылымын дамытудың 2025-2030 жылдарға арналған стратегиялық жоспарлары, соның ішінде жаңа медициналық нысандар салу және медициналық қызметтердің сапасын одан әрі арттыру туралы ақпарат берді. Қабылданған Тұжырымдама шеңберінде денсаулық сақтау ұйымдарының оңтайлы және тиімді желісін құруға бағытталған 34 жобаны іске асыру жоспарлануда.

Кездесу соңында президент ана мен бала өлімі көрсеткіштерін төмендету бойынша жұмысты жалғастыру қажеттігін атап өтті. Сонымен қатар, ол медициналық көмек көрсетудің науқасқа бағдарлануына баса назар аудара отырып, денсаулық сақтау жүйесін сапалы қайта құру бойынша міндеттер қойды. Сондай-ақ, бөлінетін қаражаттың, оның ішінде дәрі-дәрмекпен қамтамасыз етудің ашықтығы мен тиімділігін қамтамасыз ету қажеттілігі атап өтілді.