Тоқаев Алматыдағы ҰҚШҰ парламенттік ассамблеясы кеңесі отырысына қатысады

Қазақстан президенті Қасым-Жомарт Тоқаев ҰҚШҰ парламенттік ассамблеясы кеңесінің отырысына қатысу үшін Алматыға келді. Осы орайда бүгін ҰҚШҰ-ға мүше мемлекеттері спикерлерімен кездесті.

Бұл туралы ҰҚШҰ ассамблеясы хабарлады.

Отырыста, ҰҚШҰ-ның жағдайы мен даму перспективалары талқыланып, ұйымның парламенттік маңыздылығы атап өтілді.

Қазақстан президенті ҰҚШҰ парламенттік ассамблеясы қызметін жоғары бағалап, ассамблея қабылдаған үлгілік актілер Ұжымдық қауіпсіздік ұйымын нығайтудың ең маңызды бөлігі болатынын атап өтті.

 Естеріңізге сала кетейік, бүгін таңертең ҰҚШҰ елдерінің парламенттік делегациясы басшылары Алматыдағы 28 гвардияшы-панфиловшылар  саябағына келіп, Мәңгілік алауға гүл шоқтарын қойды. Салтанатты шараға Ресей мемлекеттік думасының Төрағасы Вячеслав Володин, Беларусь ұлттық жиналысы өкілдері палатасының төрағасы Игорь Сергеенко, Қазақстан мәжілісінің төрағасы Ерлан Қошанов, Қырғызстан жогорку кенешінің төрағасы Нұрланбек Шакиев пен Тәжікстан милли мәжілісінің төрағасы Эмомали Рустами қатысты. Сонымен қатар, салтанатты шараға генерал Иван Панфиловтың немересі Алуа Байқадамова да болды.