Тоқаев айтқан «бұзық әйелдердің» саны бетімен кеткен ер азаматтардан бірнеше есе аз

10 қыркүйек 2025 16:29 Альфия Адамбек

Фото: dzen.ru

8 қыркүйек күні мемлекет басшысы Қазақстан халқына жолдауында ел абыройын нұқсан келтіретін бұзақылар туралы сөз қозғап, әйелдерге айрықша тоқталды. Бірақ Тоқаевтың сөзі көптің көңілінен шықпады. Buzyq Telegram-арнасында әйелдерге қарағанда ер азаматтардың жанжалға бейім екенін көрсететін статистика пайда болды, деп хабарлайды Orda.kz.

Мемлекет басшысы жолдауында айқай-шу шығаратын, балағат сөздер айтып, қоғамдық тәртіпті бұзатын әйелдерді тілге тиек етті.

«Бұл – мәдениетті, өркениетті қоғамға жараспайтын қылық, еліміздің халықаралық қоғамдастықтағы беделіне зиян келтіретін құбылыс», – деді Тоқаев.

Buzyq Telegram-арнасы құқықтық статистика комитетінен 2025 жылдың қаңтар-шілде айлардағы құқықбұзушылардың мәліметін алған екен.

Статистика бойынша:

Ұсақ бұзақылық жасаған әйелдер саны 1832 болса, ер азаматтар — 8366 адам;
Тыныштықты бұзған әйелдер — 12 322, ал ерлер — 56 928;
14 410 әйел қоғамдық орында масаң күйде жүрсе, 108 906 азамат әйелдерді ішімдік ішуден басып озған;

Ал полиция талабына бағынбаған әйелдер — 187 болса, ер азаматтар саны — 2014.

«Сөйтсек, әдепсіз әйелдер ел бойынша аса көп емес екен. Ер адамдарға қарағанда, арулар қоғамдық тәртіпті 5 есе аз бұзады. Ішіп, жұрт алдында қуатындарының саны 7 есе аз. Ал полициямен ерегісіп, тіресіп қалатындары тіпті 10 есе аз», — деп жазылған Buzyq Telegram-арнасында.

Ақорда Тоқаевтың әйелдер туралы сөзін түсіндірді. Баспасөз қызметі президенттің сөзін көпшілік ескерту ретінде қабылдағанын, алайда оның мәні – мәдениет дағдарысына назар аудару екенін атап өтті.

«Бұл ескерту емес, жынысына, жасына және шыққан тегіне қарамастан барлығымызды қоғамға құрметті қарым-қатынас мәдениетін қайтаруға шақыру. Дөрекілік пен агрессиядан бас тарту қажет. Жолдарда, кезектерде, вокзалдарда және ұшақтарда, басқа да жерлерде біз жиі куә болатын бір-біріне құрметсіздік жағдайлары біздің менталитетіміздің бөлігіне айналмауы тиіс. Сондықтан айтылған сөздің түпкі мәні – этика қалыптастыру, қарым-қатынас мәдениетін дамыту, такт пен өзара сыйластықты көрсету. Бұл міндет ешбір жағдайда тек әйелдердің иығына артылмайды. Бұл – бүкіл қоғамның міндеті», — деп хабарлады Ақорданың баспасөз қызметі.

Айта кетейік, бүгін, 10 қыркүйек күні Ардақ Назаров Мәжілісте анасын туған күнімен құттықтады.

Жаңалықтар

барлық жаңалықтар