Тоқаев адам құқықтарына қатысты іс-шаралар жоспарына қол қойды

Мемлекет басшысы «Адам құқықтары мен заңдылықты қамтамасыз ету саласындағы іс-шаралар жоспары туралы» Жарлыққа қол қойды, деп хабарлайды Ақорданың баспасөз қызметі. 

Тоқаев үкіметке ерлер мен әйелдердің тең құқықтары мен мүмкіндіктерін ілгерілетуді қамтамасыз ететін іс-шаралар жоспарын әзірлеуді тапсырды.

Атап айтқанда:

• ерлер мен әйелдердің тең құқықтары мен мүмкіндіктерін алға жылжыту;

• балалар құқықтары;

• әйелдерге қатысты кемсітушілікті жою;

• қылмыстық сот төрелігі, жазаны орындау және азаптау мен қатыгездіктің алдын алу жөніндегі адам құқықтары;

• бірлестіктер бостандығы құқығы;

• мигранттарға, азаматтығы жоқ адамдарға және босқындарға қатысты адам құқықтары;

• мүгедектерге қатысты адам құқықтары;

• еңбек құқығы, еңбекті қорғау және кәсіподақ қызметі;

• кәсіпкерлік қызметтегі адамдардың құқықтары.

«Жоспар гендерлік теңдікті нығайтуға, тұрмыстық зорлық-зомбылыққа қарсы тұруға, қылмыстық сот төрелігі саласында азаматтарды қорғауға, азаптау мен қатыгездіктің алдын алуға бағытталған бірқатар шараларды қамтиды. Оған бірлесу бостандығы құқықтарын және еңбек ету құқығын, сондай-ақ мүгедектер құқықтарын қамтамасыз ету бойынша шаралар қабылдау кіреді. Құжат адам құқықтарын қорғаудың ұлттық жүйесін нығайтады. Жоспарды жүзеге асыру аясында тиісті заңдар қабылданатын болады», - деді президент.