Тоқаев Ғылым академиясының вице-президентімен қазақ тілі мәселесін талқылады

Кездесуде  отандық ғылымның дамуы жөнінде де пікір алмасулар болды. Мемлекет басшысы Қасым-Жомарт Тоқаев Ұлттық ғылым академиясының вице-президенті Асқар Жұмаділдаевты қабылдады, деп хабарлайды Ақорданың баспасөз қызметі. 

Асқар Жұмаділдаев Мемлекет басшысына Ұлттық ғылым академиясының соңғы үш айдағы қызметі туралы айтып, отандық ғылымды дамыту бойынша өз ұсыныстарымен бөлісті.

Сонымен қатар, академик қазақ тілін латын графикасына көшіруге қатысты өз ойын білдірді.

Мемлекет басшысы ғалымның айтқан барлық ұсыныстары ескеріліп, үкіметке тиісті тапсырмалар берілетінін айтты.

«Қасым-Жомарт Тоқаевтың пікірінше, ғылыми және академиялық қоғамдастық елімізде жаратылыстану, техника және технология салаларындағы іргелі ғылыми орталықтардың пайда болуына, ғылыми-зерттеу жұмыстарын жақсартуға, елдің әлеуметтік-экономикалық даму бойынша дәлелді ұсыныстар беруге үлес қосуы керек» делінген хабарламада.

Мемлекет басшысы академик Асқар Жұмаділдаевтың қоғамдағы жоғары беделін атап өтіп, оған Ұлттық ғылым академиясындағы жауапты қызметінде табыс тіледі.