Тоқаев Алматыда кеңес өткізді: өрт, су, экология және жастарды жұмысқа тарту

Алматыда президент қатысқан жиында ауыз сумен қамтамасыз ету, атмосфераға шығарылатын зиянды қалдықтарды азайту, халықтың әлеуметтік жағдайы туралы айтылды, деп хабарлайды Orda.kz.

Қасым-Жомарт Тоқаев Алматыға 18 тамызда келді. Қаланың гидротехникалық инфрақұрылымымен танысып, бірқатар әлеуметтік нысандарды аралады. Үкімет мүшелерінің қатысуымен мегаполистің әлеуметтік-экономикалық дамуы талқыланды.

Тоқаев Алматы қаласын дамытудың негізгі басымдықтары өткен күзде жұртшылықпен кездесуде анықталғанын, сонымен қатар үкімет қаланы 2040 жылға дейін дамытудың бас жоспарын бекіткенін еске салды.

Алдағы 20 жылда мегаполис халқының саны 3 миллион адамға дейін өседі. Өңірлердің қарқынды өсуі мен біркелкі емес дамуы мәселелері дер кезінде шешілуі тиіс.

«Халықтың саны жыл сайын орта есеппен 70 мың адамға артып келеді. Алдағы уақытта қаланың барлық бес бөлігі орталық ретінде дамитын болады. Бұл орталықтағы жағдайды жақсартып, барлық аудандарға жүктемені біркелкі бөлуге мүмкіндік береді. Соңғы 10 жылда қала серпінді, бірақ ретсіз өсті. Аумағы екі еседен астам ұлғайды. Алматыға күн сайын көрші елді мекендерден 500 мың адам жұмыс істеп, оқуға келеді. Мұндай проблемаларды дер кезінде анықтап, жою қажет», - деп атап өтті Президент.

Тоқаев өрт қауіпсіздігі мәселесіне жеке тоқталды. Бұл ретте ол жуырда «Ақкент» шағын ауданында орын алған өрт оқиғасын еске салды. Мемлекет басшысы Төтенше жағдайлар министрлігіне ауқымды оқу-жаттығулар өткізуді, соның ішінде тұрғындарды осындай жағдайларда қалай әрекет ету керектігін үйретуді тапсырды.

Президент ел үшін басты міндет – қазақстандықтарды сапалы ауыз сумен қамтамасыз ету мәселесіне назар аударып, жақында болған Медеу ауданындағы электр энергиясы үзілулерін еске салды. Мәселені шешу үшін қазан айында мегаполисте мердігерлердің кінәсінен мерзімі кейінге шегерілген Қарғалы су алабы іске қосылуы керек. «Балқаш»  станциясында да төрт құдық салынуда – олар қаланың жоғарғы бөлігіндегі үйлерді сумен қамтамасыз етеді.

Президенттің айтуынша, Алматы үшін бірінші кезектегі міндет жастардың NEET буынын (әртүрлі экономикалық, әлеуметтік немесе саяси фактор салдарынан жұмыс істемейтін және оқымайтын жастар ұрпағы – ред.)  жұмысқа орналастыру.

Кездесу барысында Алматы қаласының коммуналдық, жол-көлік және әлеуметтік инфрақұрылымын дамыту, сондай-ақ білім, экология және медицина салаларында қордаланып қалған мәселелерді шешу жолдары талқыланды.

Тоқаев бюджетке салық түсімдерінің 75 пайызын қамтамасыз ететін шағын және орта бизнестің жоғары әлеуетін атап өтті. Ол бизнесті, сондай-ақ көлік, туризм және шығармашылық салаларды дамыту бойынша жүйелі шаралар қабылдауды тапсырды.