Тоқаевтан сөгіс естіген Дүйсембаев жаңа қызметке тағайындалды

Атырау облысы бойынша департаменттің бұрынғы басшысы Аян Дүйсембаев Маңғыстау облысының полиция басшысы болып тағайындалды.

Былтыр Аян Дүйсембаев Төтенше жағдайлар министрлігінде жұмыс істеген.

2016-2019 жылдар аралығында Аян Дүйсембаев Атырау облысы ІІД бастығы болған. Артынша генералдық киім киіп, өзіне сыйға тартылған ат үстінде отырған видеоға байланысты оның айналасында жанжал шықты.

Ішкі істер министрлігі тиісті тексеру жүргізді. Анықталғандай, Аян Дүйсембаев сыйға берілген атқа мініп қана қоймай, екі қызметтік көлікті де жеке мақсатта пайдаланған. Ол Атыраудан өзі туып-өскен өңірге барып, қарамағындағы қызметкерлерімен бірге қызметтік көліктермен 300 шақырымдай жол жүріп өткен.

Ал 2019 жылдың мамыр айында Аян Дүйсембаев қызметтік этиканы бұзғаны үшін полиция бастығы қызметінен босатылған болатын.

Дүйсембаев 2019-2021 жылдары Маңғыстау облысы әкімінің кеңесшісі болды. 2021 жылдың сәуірінде ол Төтенше жағдайлар министрлігі Өртке қарсы қызмет комитеті төрағасының орынбасары болып тағайындалды.