Тоқаев жолдауын тағы да Назарбаевтан бастады

Қазақстан президенті Қасым-Жомарт Тоқаевтың 2022 жылғы қазақстандықтарға арналған жолдауы басталды.

Тоқаев бүгінге жолдауының басын қаңтар айында болған қайғылы оқиғалардан бастады.

– Бүгінгі Жолдаудың мән-маңызы айрықша. Оның арқалайтын жүгі бір жылмен шектелмейді, ауқымы кең, мазмұны да бөлек. Біз алдымызға биік мақсаттар қойып отырмыз. Өздеріңізбен бірге Жаңа Қазақстанды құруға кірістік. Осы күндерде жұртымыз Тәуелсіздіктің қадір-қасиетін жан-жүрегімен сезінді. Татулық пен тұрақтылық, тыныштық пен бейбітшілік қаншалықты маңызды екенін жете түсінді. Біз мызғымас бірліктің арқасында мемлекетімізді қорғап қалдық , - деді президент.

Жолдауының басында Тұңғыш президенттің есімі тағы да аталды.

– Халқымыз Тұңғыш президент Нұрсұлтан Назарбаевтың арқасында көптеген табыстарға қол жетккізді. Алайда береке, бірлігімізді сақтамасақ жетістіктеріміздің бәрінен айрылып қалуымыз мүмкін, - деді Тоқаев.

Мемлекет басшысының бұған дейінгі жолдауы 2021 жылдың 1 қыркүйегінде болған. Тоқаев сол жылы да жолдауының басын «Қазақстан Тұңғыш Президентіміз – Елбасының дара саясатының арқасында табысты ел ретінде бүкіл әлемге танымал болды» деген сөздерден бастаған болатын.