Тоқаев зейнетақы шегіне қатысты мәлімдеме жасады

Президент Қасым-Жомарт Тоқаев зейнетақы жинақтарын пайдалану үшін жеткіліктілік шегін арттыруды кейінге қалдыруды тапсырды.

Бұл туралы мемлекет басшысының баспасөз хатшысы Берік Уәли мәлімдеді.

«Мемлекет басшысы Қасым-Жомарт Тоқаев зейнетақы жинақтарының шекті межесін көтеру туралы шешімге қатысты көпшіліктің өтінішіне құлақ асты. 

Шекті меже келесі жылдан бастап ең төменгі жалақының өсуіне байланысты көтеріледі. Зейнетақы жүйесінің негізгі міндеті – азаматтарды зейнетке шыққаннан кейін қажетті жеткілікті табыспен қамтамасыз ету. Сондықтан зейнетақы жинақтарының шекті межесін көтеру жөніндегі шешім – негізінен осы бағыттағы дұрыс қадам.

Сонымен қатар Мемлекет басшысы зейнетақы қорындағы шекті межеден асқан қаржысын пайдаланып үлгермеген  азаматтарды қолдап, Үкіметке бұрынғы шекті межені көтеру мерзімін 2022 жылдың 1 сәуіріне дейін ұзартуды тапсырды» деді Берік Уәли өзінің Facebook парақшасында.

Естеріңізге сала кетейік, Қазақстанда 2022 жылдан бастап зейнетақы жинақтарын алу үшін жеткіліктілік шегін айтарлықтай ұлғайтуды жоспарлаған болатын.