Тоқаев заңнамалық актілерге қол қойды

Мемлекет Басшысы Қасым-Жомарт Тоқаев ҚР кейбір заңнамалық актілеріне ғылым мәселелері бойынша түзетулерге қол қойды, деп хабарлады Ақорда сайты.

Құжат ғылыми, ғылыми-техникалық салалардағы заңнаманы жетілдіруге бағытталған.

Атап айтқанда, ғылыми және ғылыми-техникалық қызмет нәтижелерін коммерцияландырудың және барлық ғылыми-зерттеу жұмыстарын қаржыландырудың ашықтығы қамтамасыз етіледі.

ҚР «Халық денсаулығы және денсаулық сақтау жүйесі туралы» кодексінде адам ағзаларын транспланттауға қатысты нормалар жетілдірілген. Сондай-ақ заңда ұлттық ғылыми кеңестердің және мемлекеттік ұлттық ғылыми-техникалық сараптама орталығының құзыреттері нақтыланады. Ғылым мен техниканың дамуына үлес қосқан ғалымдарды әлеуметтік қолдау және көтермелеу, жыл сайынғы «үздік ғылыми қызметкер» сыйлығын беру көзделеді.

Сенат төрағасы Мәулен Әшімбаев заң жобасын қарау барысында атап өткендей, құжат ғылым саласындағы сыбайлас жемқорлық тәуекелдерін азайту үшін қосымша құқықтық негіз жасайды.