Тоқаев спорт саласында реформа жүргізу қажет екенін айтты

Қазақстан президенті Қасым-Жомарт Тоқаев Токио-2020 Олимпиадасы туралы ойын айтып, әлеуметтік желіде жазба қалдырды.

Бұл туралы Orda.kz хабаралайды.

Президент Олимпиада ойындарында өнер көрсетіп, медаль алған спортшыларға алғысын білдірді. Дегенмен нәтиже бюджеттен бөлінген ақшаға сай келмейтіндігін айтты.

– Олимпиаданың қола жүлдегерлерін құттықтаймын. Бұл ұзақ уақыт бойы жүргізген табанды жаттығулардың жақсы нәтижесі.

Алайда, 8 қола медаль алып, жалпы командалық есепте 83-орынға табан тіреген Ұлттық құраманың бұл көрсеткіші Қазақстанның спорттағы әлеуетіне және мемлекет тарапынан спортты дамытуға бөлініп отырған мол қаражатқа сәйкес келмейді.

Ұлттық құраманың Олимпиададағы көрсеткіші спорт секілді аса маңызды салада шұғыл әрі тиімді реформалар жүргізу қажет екенін көрсетті. Бұқаралық және балалар спортын дамытуға көңіл бөліп, сол арқылы әлемдік аренада үлкен табыстарға қол жеткізуге ұмтылу қажет.

Токио Олимпиадасынан сабақ алып, Парижде өтетін келесі ойындарда халық үмітін ақтайтындай нәтижеге қол жеткізу керек,- деді Тоқаев.

Токио-2020 ойындарында Қазақстан құрамасының спортшылары 8 қола медаль алып, 83 орынға табан тіреген.