Тоқаев: содырлар Қазақстанға гастарбайтер атын жамылып келді

Тергеушілердің айтуынша, әуежайды  Орталық Азияның бір қаласынан келген азаматтардың өтуін қамтамасыз ету үшін басып алған.

Қазақстан президенті Қасым-Жомарт Тоқаев содырлардың Қазақстанға гастарбайтер атын жамылып келгенін айтты. Мемлекет басшысының сұхбатынан осындай үзіндіні «Хабар 24» телеарнасы келтірді.

 – Әрине, бұл адамдар материалдық құндылықтарға қызығушылық танытпады, олар әкімшілік ғимараттарына  шабуылдарға жетекшілік етті.  Олардың  қылмыстық істерге, құқық қорғау органдарының қызметкерлеріне қатысты деректерге қызығушылығы болды. Бұл мұқият жоспарланған шетелдік содырлардың террористік әрекеті болды.  Содырлардың әуежайды басып алуды ұйымдастырғанын байқаған боларсыздар. Қазір тергеу әуежай Орталық Азияның бір қаласынан келген азаматтардың өтуін қамтамасыз ету үшін басып алынғанын көрсетіп отыр. Бұл, әрине, гастарбайтер атын жамылып ұшып келген, қалаға кіргізіліп, операцияны басқара бастағандар, - деді Қасым-Жомарт Тоқаев.

Сұхбатта президент қайғылы қаңтар оқиғасының себептері мен салдары, одан әрі саяси және әлеуметтік реформалар, Қазақстанның негізгі сыртқы саяси серіктестерімен қарым-қатынастары туралы қоғамды толғандыратын сұрақтарға жауап береді.