Тоқаев ҰҚШҰ-ға мүше мемлекеттер басшыларымен телефон арқылы сөйлесті

Қазақстан президенті Қасым-Жомарт Тоқаев Ұжымдық қауіпсіздік шарты ұйымына мүше мемлекеттердің басшыларымен телефон арқылы сөйлесті.

Ақорда сайтының хабарлауынша, мемлекет басшысы Ресей президенті Владимир Путинмен, Армения премьер-министрі Никол Пашинянмен, Беларусь президенті Александр Лукашенкомен, Қырғызстан президенті Садыр Жапаровпен және Тәжікстан президенті Эмомали Рахмонмен телефон арқылы сөйлесті.

«Қасым-Жомарт Тоқаев ҰҚШҰ-дағы әріптестерін бүгін, 13 қаңтарда біздің елден бітімгершілік контингентінің шығарылуы басталғаны туралы хабардар етіп, Қазақстанға лаңкестік әрекет жасаған кезде көрсеткен қолдаулары үшін алғыс білдірді» делінген хабарламада.

Мемлекет басшысы ұжымдық бітімгершілік күштердің Қазақстанда қысқа мерзімді болуы ҰҚШҰ-ның беделді халықаралық ұйым ретіндегі өзектілігі мен тиімділігін көрсеткенін ерекше атап өтті.