Тоқаев Сенатқа Жоғарғы сот судьясын қызметінен босатуды ұсынды

Қазақстан президенті Қасым-Жомарт Тоқаев Сенатқа Жаңылсын Арқарованы Жоғарғы соттың судьясы қызметінен босатуды ұсынды.

Бұл туралы парламенттің жоғарғы палатасының баспасөз қызметі хабарлады.

«Сенаттың Конституциялық заңнама, сот жүйесі және құқық қорғау органдары комитетінің кеңейтілген отырысында депутаттар еліміз президентінің Жоғарғы Сот судьясы қызметінен босатуды ұсынған кандидатураны талқылады.

Сенат комитеті Жоғарғы Соттың судьясы Арқарова Жаңылсын Баянқызын орнынан түсуіне байланысты мемлекет басшысы Қасым-Жомарт Тоқаевтың ұсынымын қарай келіп, парламент сенатына оны қызметінен босатуды ұсынған қорытынды шығарды» делінген хабарламада.

Арқарова 2012 жылдың маусымында Жоғарғы Соттың судьясы болды, ал 2020 жылдың желтоқсанынан бастап Қазақстан Жоғарғы Сот Кеңесінің мүшесі.