Тоқаев Рыбакинаны Уимблдондағы тарихи жеңісімен құттықтады

Қазақстан Республикасының Президенті Қасым-Жомарт Тоқаев Twitter-дегі парақшасында қазақстандық теннисші Елена Рыбакинаны Уимблдон турниріндегі жеңісімен құттықтады.

 «Қазақстандық теннисші Елена Рыбакина ең беделді Уимблдон турнирінде тарихи жеңіске жетті. Көрнекті спортшыны шын жүректен құттықтаймын!» деп жазды Тоқаев Twitter парақшасында.

Еске салайық, Елена Рыбакина Уимблдон финалында әлемнің екінші ракеткасы, Тунис өкілі Онс Жабермен кездесті. Ол тарихи жеңіске қол жеткізіп, «Үлкен дулыға» турнирінде жеңіске жеткен қазақстандық тұңғыш теннисші атанды.

Финалда есепті Елена Рыбакина ашты, бірақ бірінші сетте Рыбакина әлемнің екінші ракеткасы Онс Жаберден жеңіліп қалды. Қорытынды есеп 3:6 болып Тунис өкілінің пайдасына шешілді.

Уимблдон финалының екінші сеті қазақстандық арудың пайдасына шешіліп, 6:2 есебімен аяқталды.

Үшінші сет өзгеріссіз қалып,  6:2 есебімен Елена Рыбакинаның жеңісімен аяқталды.

Елена Рыбакина - қазақ теннисі тарихының жаңа парақтарын ашқан спортшы  ретінде сақталатыны сөзсіз.

7 шілдеде теннисші жекелей сында «Үлкен дулыға» турнирінің финалына біздің спортшылардан бірінші болып шықты. Бұл «үлкен табыс» Қазақстан президенті Қасым-Жомарт Тоқаевтың твиттерінде де атап өтілді.