Тоқаев Ресей премьер-министрі Мишустинмен кездесті

Президент Тоқаев Қазақстан мен Ресей үкімет басшыларының өткізген келіссөздерінің қорытындысын жоғары бағалады.

Бұл туралы Orda.kz Ақорданың баспасөз қызметіне сілтеме жасап хабарлайды.

– Кеше сіздер өте мазмұнды, табысты келіссөздер жүргіздіңіздер. Ынтымақтастықты одан әрі қарқынды дамытуға мүмкіндік беретін маңызды келісімдерге қол қоюға дайындық жүріп жатыр. Пандемияға байланысты туындап отырған барлық қиындықтарға қарамастан, екі ел арасындағы сауда өткен 5 айдың ішінде 26 пайызға артты, – деді Қасым-Жомарт Тоқаев.

Ресей премьер-министрі Михаил Мушистин Қасым-Жомарт Тоқаевқа қонақжайлығы үшін алғыс білдіріп, Владимир Путиннің сәлемін жеткізді.

– Біз бауырлас Қазақстанмен арадағы достық, әріптестік және одақтастық қатынастарымызды жоғары бағалаймыз. Үкіметтеріміз арасындағы байланыстардың мазмұны терең. Бірлесіп жұмыс жасауға зор мүмкіндіктер бар. Сауда-экономикалық ынтымақтастығымыз жақсы дамып келеді, – деді Михаил Мишустин.

Әңгімелесу барысында Қазақстан мен Ресейдің пандемияға қарсы күрес және бірлесіп вакцина шығару сияқты өзара іс-қимылдағы басым бағыттар туралы сөз болды.

Тараптар аймақтар арасындағы байланыстардың оң қарқыны туралы да пікір алмасты. Бұл қатынастарға осы күзде Көкшетау қаласында мемлекет басшыларының қатысуымен өтетін кезекті Аймақаралық ынтымақтастық форумы тың серпін береді.