Тоқаев партияластарын алаяқтыққа бармауға шақырды

Қазақстан президенті, «Аманат» партиясының төрағасы Қасым-Жомарт Тоқаев партия мүшелері халықтың алдында  көзбояушылықпен  айналыспауы керек екенін айтты.

 «Нұр Отан» партиясының кезектен тыс съезінде партия атауын Аманат деп өзгерту туралы шешім қабылданды.

Тоқаевтың айтуынша, «Аманат» партиясы – халықтың пікірі мен тілегін тыңдайтын, сонымен қатар халықтың мүддесі үшін әрекет ететін парасаттылық пен ұлттық бірліктің партиясы.

— Біріншіден, сайлау кезінде берілген уәделерді орындау қажет. Тағы бір жайт, партия популизмге берілмей, мүмкін емес нәрсені уәде етіп, содан кейін премьер-министр мен оның кабинетінің мүшелерін басынан қағып, қажетті цифрларды талап етпеуі керек. Міне, осылайша ара алшақтық пен  халықтың партияға деген сенімсіздігі туады, оның  өте жағымсыз салдары бар. Мұның барлығы халықтың әлеуметтік әл-ауқаты мен ішкі саяси тұрақтылыққа тікелей әсер ететін «көз жұму» деп аталады, - деді президент.

Тоқаев бұл жағдай, әсіресе геосаяси тұрақсыздығы жағдайында Қазақстан үшін мүлдем қолайсыз деп қосты.

Оның айтуынша, партияның ребрендингі оның атын өзгертумен шектеліп қалмауы керек, барлық партия жұмысын қайта құру қажет. Орталық   филиалдармен және бастауыш ұйымдармен, ал олар өз кезегінде сайлаушылармен өзара тығыз әрекеттесу әдістерін қайта қарауы қажет.

 «Аманат» төрағасы бюрократия мен «қағазбастылықтан» бас  тартатын уақыт жеткенін қадап айтты.

— Бюрократияның ең нашар қасиеттері партия аппаратының жұмысында анық байқала бастады. Есептер мен ресми іс-шаралар сайлаушылармен тікелей жұмысты көлеңкеде қалдырды. Көздері оттай жанған  жас талаптар  бейқам функционерлерге жол беруге мәжбүр болды, - деді Тоқаев.

Партияның Мәжіліс пен мәслихаттардағы қызметін жандандыру қажет, деп қосты президент. Парламенттік фракциялар диалог алаңдарын ұйымдастыруды өз мойнына алып, тек депутаттық сауалдың құралын ғана емес, парламенттік және қоғамдық тыңдаулар, қоғамдық пікірталастардың мүмкіндіктерін де пайдалануы керек.

— Қоғамдық талқылаулар назарын әлеуметтік желілер мен қала алаңдарынан парламент пен мәслихаттардың қабырғаларына аударған жөн. Бұл өте маңызды міндет. Қажет болса, нақты үкімет мүшелеріне, әкімдерге сенім білдіру мәселесін көтеру керек. Барлық деңгейдегі партия депутаттарының рейтингі, ең алдымен, дайындалған есептерге емес, нақты істерге, азаматтардың мәселелерін шешуге негізделуі керек. Жауапкершілік аясын кеңейту үшін барлық сайлау топтарына фракциялардың депутаттарының арасынан кураторлар тағайындау қажет, - деді Тоқаев.