Тоқаев өзіне берілген ордендерден бас тартты

Қасым-Жомарт Тоқаев президенттік өкілеттігі аяқталмайынша не отандық, не шетелдік марапаттарды қабылдамауды шешті.

Бұл туралы «YEDILOV ONLINE» telegram-арнасы хабарлайды. Ақпаратты Ақорданың баспасөз қызметі растады.

Ресейлік тарап Қасым-Жомарт Тоқаевты «Александр Невский» орденімен марапаттауды ұсынған.

«Мемлекет басшысы көрсетілген құрмет үшін алғыс айтты. Алайда ол өзінің президенттік өкілеттігі аяқталғанша отандық немесе шетелдік марапаттарды қабылдамауды ұйғарды. Дәл сол себепті жақында Бішкекке жасаған сапары кезінде президент Қырғызстанның ең жоғары ордені бірінші дәрежелі «Манас» орденінен бас тартты» делінген хабарламада.

Қасым-Жомарт Тоқаевтың баспасөз хатшысы Руслан Желдібай бұл ақпаратты растады.

Еске сала кетейік, Тоқаев Санкт-Петербург халықаралық экономикалық форумында болды. Владимир Путинмен кездесу барысында Қасым-Жомарт Тоқаев Қазақстанның ЛХР және ДХР деп аталатын елдерді мойындамайтынын атап өтіп, сондай-ақ бірқатар ресейлік депутаттардың қисынсыз мәлімдемелеріне наразылығын білдірді.