Тоқаев: Назарбаевтай біртуар тұлғасы бар қазақ – бақытты халық

Қасым-Жомарт Тоқаев тәуелсіздіктің 30 жылдығына арналған салтанатты жиында Елбасының Қазақстан мемлекетін құру міндетін абыроймен атқарғанын айтты.

– Ең күрделі, бұлыңғыр кезеңде Нұрсұлтан Әбішұлы Назарбаевтай дара тұлға тарих төріне шықты. Тәуелсіздік шежіресі Елбасының қолымен жазылды. 1991 жылы 1 желтоқсанда халқымыз оған бірауыздан дауыс беріп, сенім мандатын тапсырды. Ал 16 желтоқсанда президент Қазақстан Республикасының мемлекеттік тәуелсіздігі туралы Конституциялық заңға қол қойды. Ақиқатын айтсақ, бұл халқымыздың тарихындағы ең қуанышты әрі бақытты сәт болды. Сол сәттен Қазақ елінің жаңа дәуірі басталды, - деді президент тәуелсіздіктің отыз жылдығына арналған салтанатты жиында.

Президент 17 желтоқсан күні Назарбаев Алматыдағы алаңға келіп, елдің ортасына шыққанын еске салды.

– Бәлкім, бүгін бәрі оңай көрінер. Тіпті, кейбір адамдар Тәуелсіздіктің құндылығын жете түсінбеуі мүмкін. Ал аға буын оның қандай қиындықпен келгенін жақсы біледі. Тарихи күндердің әрбір минутын тек Елбасы ғана жан жүрегімен сезініп, басынан өткерген деп айтсақ артық емес, - деді Қасым-Жомарт Тоқаев.

Тоқаев өз сөзін түйіндей келе Назарбаев халықтың ұлы перзенті екенін айтты.

– Түптеп келгенде, Нұрсұлтан Назарбаев халқымыздың ұлы перзенті екенін өз еңбегі арқылы толық дәлелдеді. Жұртымыз оның дара басшылығымен кедергінің бәрінен сүрінбей өтті. Бүгінгі мерейлі мемлекетіміз – Елбасымыздың ерен еңбегінің жемісі, көзсіз ерлігінің жеңісі! Ол Тәуелсіз Қазақстанның негізін қалаған тұлға ретінде әлем тарихынан мәңгі орын алады. Тұңғыш Президентіміз жаһан жұртының алдында ұлт мүддесін қорғай білген көреген саясаткер. Осындай бірегей қасиеттің бәрі бойына тоғысқан біртуар тұлғасы бар қазақ – бақытты халық, - деп түйіндеді Тоқаев.