Тоқаев: мемлекетіміздің тұтастығын сақтай алдық

Қазақстан президенті Қасым-Жомарт Тоқаев мемлекеттің басты міндеттері мен үкіметтің басымдықтары туралы ойымен бөлісті.

«Мемлекеттің басты міндеті – отандастарымыздың игілігі мен тұрмыс сапасын қамтамасыз ету. Әділ бәсекені дамыту, шағын және орта бизнесті қолдау, мемлекеттік қолдау шараларының  ашықтығы – жаңа экономикалық бағыттың негізгі қағидалары.

Үкімет ұлттық валютаның тұрақты бағамын қамтамасыз етуге басымдық беруге тиіс. Теңгені бекемдемей және инфляцияны төмендетпей, орнықты экономикалық өсімге қол жеткізу, азаматтардың әл-ауқатын арттыру, инвесторлардың сеніміне ие болу мүмкін емес» деп жазды Тоқаев өзінің Twitter-дегі парақшасында.

Оның айтуынша, аймақтық сәйкессіздіктерді еңсеруге ерекше назар аударуды қажет етеді.

«Өңірлер арасындағы даму алшақтығын еңсеруге баса мән беру керек. Жұмыспен қамту мәселесін шешіп, еліміздің барлық облысының әлеуметтік және мәдени дамуына жағдай жасау керек. Аймақтарда шетелдік жетекші жоғары оқу орындарының филиалдары ашылады» деп жазды президент.

Сондай-ақ, ол Алматыны қалпына келтіруге қаражат бөлінетінін айтты.

«Жалпыхалықтық «Қазақстан Халқына» қоры азаматтардың нақты проблемаларын шешуге қызмет етеді. Қор сирек кездесетін ауруға шалдыққан балаларды емдеуге көмектесіп, әлеуметтік және мәдени нысандардың құрылысын қаржыландырады. Алматыны қалпына келтіруге қаржы бөлінеді» деді мемлекет басшысы.

Сонымен қатар, ол жаңа Қазақстан табысты әрі өркедеген ел болатынына сенімді.

«Мемлекетіміздің тұтастығын, бейбітшілік пен келісімді бірлесіп сақтай алдық. Азаматтарымыз экстремистермен күресте патриотизм мен бірліктің үлгісін көрсетті. Еліміз дамудың жаңа кезеңіне қадам басты. Бұл – шынайы жаңарудың кезеңі. Табысты әрі өркендеген Қазақстанды бірге құрамыз!» деп түйіндеді Қасым-Жомарт Тоқаев.