Тоқаев медицина қызметкерлерін құттықтады

Қазақстан Республикасының Президенті Қасым-Жомарт Тоқаев дәрігерлер мен денсаулық сақтау қызметкерлерін кәсіби мерекелерімен құттықтады.

Баршаңызды Медицина қызметкері күнімен құттықтаймын!

Сіздер адамгершілік пен ізгілік мұраттарына қалтқысыз қызмет етіп келесіздер.   

Қоғамымыз дәрігер парызының ерекше мән-маңызына күн өткен сайын көз жеткізуде. Көптеген дарынды жастар осы мамандықты игеруге ұмтылып жатыр.  

Мемлекет медицина қызметкерлеріне жан-жақты қолдау көрсетіп, денсаулық сақтау саласын дамытуға баса назар аударады. Ұлт саулығы – Жаңа Әділетті Қазақстанды құру  жолындағы мемлекеттік саясатымыздың аса маңызды бағыты.

Сіздерге ерен еңбектеріңіз, Гиппократ антына адалдықтарыңыз үшін шын жүректен ризашылығымды білдіремін.

Баршаңызға зор денсаулық, бақ-береке тілеймін!

Тоқаев мемлекет медицина қызметкерлерін алдағы уақытта да жан-жақты қолдайтынына, денсаулық сақтау саласын дамытуға ерекше көңіл бөлетініне уәде берді, өйткені ұлт денсаулығы – Жаңа Қазақстанды құруға бағытталған мемлекеттік саясаттың ең маңызды бағыты.