Тоқаев Мажарстан премьер-министрі Виктор Орбанмен кездесті

Қасым-Жомарт Тоқаев Түркі кеңесі саммиті кезінде Мажарстанның премьер-министрі Виктор Орбанмен келіссөз жүргізді.

Кездесу барысында екі ел арасындағы сауда-экономикалық, инвестициялық, мәдени-гуманитарлық салалардағы қазақ-мажар ынтымақтастығының  даму перспективалары талқыланды.

Пандемияға қарсы күрес шаралары мен климаттың өзгеруіне қатысты мәселелер  қозғалды. Сонымен қатар олар аймақтық күн тәртібіндегі өзекті мәселелер, оның ішінде Ауғанстандағы жағдай туралы да сөйлесті.

Қасым-Жомарт Тоқаев Қазақстан мен Мажарстан арасындағы екіжақты қатынастардың дамуын жоғары бағалап, өзара байланыстардың қарқынды дамып келе жатқанын атап өтті.

— Қазақстанда Мажарстанды жақсы біледі және оған құрметпен қарайды. Біздің Орталық Еуропадағы алғашқы елшілігіміз Будапешт қаласында ашылды. Ынтымақтастығымыздың әлеуеті зор. Сондықтан біздің ортақ міндетіміз ведомстволарымыз бен үкіметтерімізді алға ұмтылуға, оның ішінде экономика бағытында ілгерілеуге, сондай-ақ БҰҰ және ЕҚЫҰ сияқты халықаралық ұйымдар аясында ықпалдастық жасауға ынталандыру деп ойлаймын, – деді мемлекет басшысы.

Өз кезегінде Виктор Орбанекі ел халықтарының тарихи тығыз байланыстарын атап өтті. Кездесу соңында Виктор Орбан Қазақстан президентін келер жылы Мажарстанға сапарлап келуге шақырды.