Тоқаев Маңғыстау облысына қатысты жаңа мәлімдеме жасады

Қазақстан президенті Қасым-Жомарт Тоқаев Маңғыстау облысындағы қазіргі жағдайға қатысты жаңа мәлімдеме жасады.

Қасым-Жомарт Тоқаев Ақтауда үкіметтік комиссия жұмысын бастағанын айтты.

– Құрамында Президент Әкімшілігінің қызметкерлері бар үкіметтік комиссия Ақтауда жұмысқа кірісті. Республикалық оперативтік штаб тұрақты негізде жұмыс істеп жатыр. Комиссияға еліміздегі тұрақтылықты сақтай отырып, туындаған мәселе бойынша өзара тиімді шешім шығару жүктелді, - деп жазды Тоқаев Twitter-де.

Сондай-ақ, құқық қорғау органдарына тәртіптің сақталуы туралы тапсырма берілгенін де атап өтті.

– Құқық қорғау органдарына қоғамдық тәртіптің бұзылуына жол бермеу жөнінде тапсырма берілді. Шерушілер жауапкершілік танытып, диалогқа дайын болуға тиіс

2 қаңтар күні Жаңаөзенде жаппай сұйытылған газ бағасының өсуіне байланысты наразылық шеруі басталды. Сол күні түнгі уақытта президент Қасым-Жомарт Тоқаев Twitter парақшасында мәлімдеме жасап, жағдайдың бақылауда екенін жазды. Сондай-ақ, азаматтардың өз ойын ашық айтуға құқығы бар екенін жеткізді. Президент тапсырмасымен үкіметтік комиссия құрылып, газ бағасы 120 теңгеден 85-90 теңгеге төмендейтіні хабарланды. Халяқ оған көнбеді, “газ бағасы 50 теңге болу керек” деп үкіметке талап қойды. Маңғыстау облысының әкімі наразылық білдірген топ алдына шығып, халықпен сөйлесуге тырысты.

Қазақстанның әр өңірінде Жаңаөзен халқын қолдау үшін бейбіт жиындар өтті. Энергетика министрі журналистердің сауалына жауап бере отырып, жауапкершілікті сезінетін айтты. Ақтауға әскери үлгідегі екі ұшақ келіп қонғаны туралы ақпарат тарады. Мемлекет басшысының тапсырма бергеніне 24 сағаттан асқанымен наразылық білдірушілер әлі тарқамаған. Алаңда газ бен ел үкіметіне қатысты түрлі ұрандар айтылып жатыр.