Тоқаев Ұлттық банк басшысына тапсырма берді

Мемлекет басшысы Қасым-Жомарт Тоқаев Ұлттық банк төрағасы Ғалымжан Пірматовты қабылдады, деп хабарлайды Ақорда сайты.

Мемлекет басшысы Ұлттық банктің 2022 жылғы бірінші тоқсандағы ақша-несие саясатын іске асырудың алдын ала қорытындылары туралы, сонымен қатар қаржылық және баға тұрақтылығын қамтамасыз ету бойынша қабылданып жатқан шаралар туралы есебін тыңдады.

Мемлекет басшысына сыртқы және ішкі нарықтардағы жағдай туралы баяндалды. Ғалымжан Пірматов валюта нарығындағы үрдістерге тоқталып, Ұлттық банктің алтын-валюта резервтері мен Ұлттық қор активтерінің жай-күйіне тоқталды.

Сондай-ақ,  Қасым-Жомарт Тоқаевқа  инфляция динамикасы, банк жүйесіндегі депозиттер құрылымындағы өзгерістер, зейнетақы активтерінің жағдайы және төлем жүйесінің дамуы туралы баяндалды.

Кездесу қорытындысы бойынша Мемлекет басшысы бірқатар нақты тапсырмалар берді.