Тоқаев коронавирустың жаңа штамына қатысты пікір білдірді

Президент Қасым-Жомарт Тоқаев Дүниежүзілік денсаулық сақтау ұйымының (ДДҰ) арнайы сессиясының ашылу салтанатында сөз сөйледі.

– Дүниежүзілік денсаулық сақтау ұйымының барлық мүше мемлекеттері мен денсаулық сақтау жүйелері күрделі дағдарысқа тап болуды жалғастыруда. Дүние жүзінде тез тарала бастаған коронавирустың жаңа нұсқасына байланысты алдағы апталарда COVID-19 ауруын жұқтыру жағдайлары артады. Оңтүстік африкалық зерттеушілер Omicron штамын анықтады және бұл жаңа жаһандық қауіп болып табылады, - деді Қасым-Жомарт Тоқаев.

Мемлекет басшысының айтуынша, пандемия халықаралық ынтымақтастықтағы көптеген кемшіліктерді көрсетті, ал дағдарыстың әлеуметтік-экономикалық салдары барлық деңгейдегі әлеуметтік құрылымды қайта қарауға әкелді. Пандемия ынтымақтастыққа негізделген жаңа жаһандық көзқарас пен биологиялық сын-қатерлермен күресу үшін тиімдірек жүйе қажет екенін растады.

Қазақстан президенті ДДСҰ-ны жаңа қауіптерге дайындық жөніндегі конвенция құру идеясын қолдайтынын атап өтті.

– Қазақстан ДДСҰ-ны сенімді серіктесі ретінде қолдайды. Біз бас директор, доктор Тедростың (Гебрейсус, ДДҰ басшысы) осы аурумен күреске қосқан оң үлесін бағалаймыз, - деді Тоқаев.