Тоқаев корей компанияларын 5G жобаларын іске асыруға шақырды

Қазақстан президенті Қасым-Жомарт Тоқаев қазақ-корей дөңгелек үстеліне қатысты.

Бұл туралы Orda.kz Ақордаға сілтеме жасап хабарлады.

Мемлекет басшысы жоғары деңгейдегі келіссөздерден кейін корейлік және қазақстандық ірі компаниялардың қатысуымен өткен дөңгелек үстелге қатысты. Сондай-ақ, Тоқаев Оңтүстік Корея Қазақстанның өте маңызды стратегиялық серіктесі екенін еске салды.

– Соңғы 15 жылда сіздің елден келген тікелей инвестициялар көлемі 6  млрд доллардан асты. Қазақстанда корей капиталының қатысуымен 550-ден астам кәсіпорын табысты жұмыс істеп жатыр. Оның ішінде Samsung, Hyundai, Lotte, Posco, KNOC және т.б. сияқты жетекші корпорациялар бар. Олардың қатысуымен жалпы құны 2,5 млрд доллардан асатын 24 ірі жоба іске асырылды. Маңызды жоба - кореялық SK Engineering & Construction компаниясының қатысуымен Үлкен Алматы айналма жолының құрылысы (БАКАД), - деді Тоқаев.

Мемлекет басшысы автомобиль өнеркәсібі, тұрғын үй құрылысы, металлургия және ауыл шаруашылығы сияқты салаларда құны 1,5 млрд доллардан асатын 16 перспективалы инвестициялық жобаны іске асыру жоспарлары туралы айтты.

Президент инновациялар мен жаңа технологияларға негізделген экономиканы қалыптастырудың басымдығына тоқталды.

Сонымен қатар, Мемлекет басшысы Қазақстанда инновациялық технологияларды дамыту үшін заманауи инфрақұрылымның бар екенін атап өтті.

– Біз компьютерлік технологиялар, желілік жабдықтар мен деректерді өңдеу орталықтары бойынша бірлескен кәсіпорындар құруға мүдделіміз. Қазақстан сонымен қатар 5G желісін енгізу бойынша жұмыс жүргізуде. Алғашқы сынақтар ірі қалаларда жүргізілді. Мен Кореялық компанияларды Қазақстанда 5G жобаларын жүзеге асыруға қатысуға шақырамын, - деді Қасым-Жомарт Тоқаев.

Президент инвесторлар үшін институционалды орта қалыптастыру туралы айта отырып, Kazakh Invest ұлттық компаниясының, арнайы экономикалық және индустриалды аймақтардың, сондай -ақ, Астана халықаралық қаржы орталығының мүмкіндіктерін пайдалануға шақырды.

Дөңгелек үстел нәтижесінде жалпы сомасы 1,7 млрд доллар болатын 34 келісімге қол қойылды. Оның ішінде 21 коммерциялық және 13 коммерциялық емес құжат бар. Инвестициялық жобаларды бірлесіп жүзеге асыру туралы қол жеткізілген келісімдер өндірістің жоғары тиімділігі мен экологиялық тазалығына негізделген корейлік технологиялардың трансфертін қарастырады.