Тоқаев әйелдерді Халықаралық мерекемен құттықтады

Мемлекет басшысы Қасым-Жомарт Тоқаев Қазақстан әйелдерін Халықаралық әйелдер күнімен құттықтады, деп хабарлайды Ақорда сайты.

 «Көктемнің бұл тамаша мерекесі сұлулықтың, мейірімділіктің және махаббаттың бейнесіне айналды. «Әйел бір қолымен бесікті тербетсе, екніші қолымен  әлемді тербетеді» деген нақыл сөзіміздің символдық мәні терең. Қазақстанда әйелдердің өзін-өзі танытуына барлық жағдай жасалған. Олар білім мен денсаулық сақтауда, мәдениет пен спортта, өндірісте және құқық қорғау салаларында сұранысқа ие»  делінген құттықтауда.

Мемлекет басшысы Қазақстан әйелдерінің мемлекеттік органдарда және ірі компанияларда басшылық қызметтерді атқарып, бизнесте табысқа жетіп жатқанын атап өтті.

 «Өскелең ұрпақ тәрбиесіндегі ананың рөлі ұшан-теңіз. Бұл игі іс шынайы құрметке лайық. Кез келген бизнесте әйелдер кәсібилік пен жауапкершілікті көрсетеді, қай салада болмасын келісімді, татулықты, өзара түсіністікті нығайтуға үлес қосады. Қазақстан жүйелі және саяси трансформация кезеңіне аяқ басты. Еліміздің әйелдерінің жасампаздық қуаты Жаңа Қазақстанның қуатты қозғаушы күшіне айналатынына сенімдімін!» деп атап өтті Тоқаев.

Соңында Мемлекет басшысы қазақстандық әйелдерге денсаулық, бақыт және бақ-береке тіледі.