Тоқаев халық өтінішіне жедел жауап беруді тапсырды

Қазақстан Президенті Қасым-Жомарт Тоқаев Президент Әкімшілігінің, Қауіпсіздік кеңесінің, Бас прокуратураның, Ұлттық қауіпсіздік комитетінің, Қорғаныс және Ішкі істер министрліктерінің басшылығымен өткен кеңесте қазақстандықтардың өтініштеріне жедел ден қоюды тапсырды, деп хабарлайды Ақорда.

Президент құқық қорғау органдары мен ақпарат саласындағы уәкілетті органдар күш-жігерін үйлестіріп, қоғам сұранысына жедел ден қоюы керектігін қадап айтты. Азаматтардың өліміне қатысты мәселеге тоқталған Мемлекет басшысы Бас прокуратура мен Ішкі істер министрлігіне әрбір факті бойынша жан-жақты тексеру жүргізуді тапсырды.

— Біз қоғамның болжам мен тұспалға негізделген оқиғалар туралы пікірін қалыптастыруына жол бере алмаймыз. Халық  биліктің ашықтық пен заңдылықты қамтамасыз ететінін көруі керек, - деді Қасым-Жомарт Тоқаев.

Президент Әкімшілігі басшылығына бұл мәселені бақылауға алу тапсырылды. Бұған дейін хабарланғандай, лаңкестік, кісі өлтіру, билік өкілдеріне күш көрсету, бұзақылық, мемлекеттік ғимараттарға шабуыл жасау және басқа да қылмыстар бойынша 1822 қылмыстық іс қозғалған.