Тоқаев халықаралық шарттар туралы түзетулерге қол қойды

Қазақстан президенті Қасым-Жомарт Тоқаев халықаралық шарттарға өзгерістер мен толықтырулар енгізуге қол қойды. Бұл туралы Ақорданың ресми сайты хабарлады.

– Мемлекет басшысы «Қазақстан Республикасының халықаралық шарттары туралы» Қазақстан Республикасының Заңына өзгерістер мен толықтырулар енгізу туралы» Қазақстан Республикасының Заңына қол қойды, - делінген хабарламада.

Түзетулер халықаралық шарттар туралы заңнаманы жетілдіруге бағытталған.

– Даулы мәселелер туындаған кезде біз ұлттық мүдделерімізді толықтай ескеру негізінде ақылға қонымды шешімдер табуға ұмтыламыз. Біз тәуелсіздік, егемендік, шекаралардың мызғымастығы мен аумақтық тұтастығы сияқты біз үшін қасиетті құндылықтарға нұқсан келтіретін кез келген келісімдерге ешқашан жол бермейміз. Біз ең алдымен Қазақстанның мүддесін табанды түрде қорғауымыз керек. Заң жобасы, егер оған Қазақстан Республикасының Президенті қол қойған болса, халықаралық шарт жобасының мәтінін бекіту бойынша нормативтік құқықтық актілерді қабылдау қажеттігі бөлігіндегі құқықтық олқылықты жояды, - деді бұған дейін Мәжіліс депутаты Айгүл Құспан парламентте түзетулерді таныстыра отырып.