Тоқаев екі күнге Ресейге жұмыс сапарымен барады

Қазақстан президенті Қасым-Жомарт Тоқаев Ресейге екі күнге жұмыс сапарымен барады. Президенттің баспасөз-хатшысы Берік Уәли өз facebоок парақшасында Тоқаевты ресейлік әріптесі Путин шақырғанын жазған.

«10-11 ақпанда Қазақстан президенті Қасым-Жомарт Тоқаев Владимир Путиннің шақыруымен Ресей Федерациясына жұмыс сапарымен барады. 10 ақпанда Мәскеуде екі ел басшысы келіссөз жүргізеді. Кездесу барысында мемлекеттер басшылары Қазақстан мен Ресей арасындағы көпжақты стратегиялық серіктестіктің даму перспективаларын қарастырады» делінген жазбада.

Сонымен қатар, Тоқаевтың 11 ақпан күні Қазан қаласында Татарстан президенті Рустам Миннихановпен кездесетіні белгілі болды. Тоқаев ол жақтағы бірқатар ірі өнеркәсіптік кәсіпорындарды аралап көреді.