Тоқаев Досаевқа Алматы қаласының тұрғын үй қорын жаңартуды тапсырды

Алматы әкімі Ерболат Досаев Мемлекет басшысына зардап шеккен кәсіпкерлерге келтірілген шығынды өтеу туралы айтты, деп хабарлайды Ақорда.

Кәсіпкерлік субъектілеріне жедел көмек көрсету үшін оңайлатылған тетік бойынша төлем мөлшері 10 миллион теңгеге дейін ұлғайтылды, өтініштерді қарау мерзімі екі есеге – 1 айдан 2 аптаға дейін қысқартылды.

Бүгінгі күні тіркелген 1413 кәсіпкердің 755-і өтемақысын алған. 10 наурызға дейін ШОБ субъектілерінен түскен өтініштердің 90 пайызы қанағаттандырылады.

Қасым-Жомарт Тоқаевқа әлеуметтік маңызы бар азық-түлік тауарларының бағасын тұрақтандыру және халықтың әлеуметтік осал топтарын қолдаудың тиімділігін арттыру шаралары ұсынылды.

Мемлекет басшысына қаланың денсаулық сақтау жүйесін жаңғырту және жалпы білім беретін мектептердегі орын тапшылығын азайту тәсілдері туралы баяндалды.

Тоқаев қаланы қалпына келтіру және кәсіпкерлік субъектілеріне келтірілген залалды өтеу бойынша жұмысты жандандыруды, қаланың инженерлік желілерін жаңарту бойынша ұсыныстар дайындауды және апатты және тозығы жеткен тұрғын үйлердің санын азайту үшін тұрғын үй қорын жаңартуға баса назар аударуды тапсырды.