Тоқаев Әбу-Дабидің тақ мұрагерін Қазақстанға шақырды

Қазақстан Президенті Қасым-Жомарт Тоқаев Әбу-Дабидің тақ мұрагері шейх Мұхаммед бен Заид Әл Нахаянмен телефон арқылы сөйлесті.

Екі ел басшылары бір-бірін қасиетті Рамазан айының басталуымен құттықтады. Сондай-ақ,  Қасым-Жомарт Тоқаев Мұхаммед бен Заид Әл Нахайянды 2020 жылғы Дүниежүзілік ЭКСПО көрмесінің Дубайда сәтті өтуімен құттықтады.

Әңгімелесу барысында екіжақты сауда-экономикалық және инвестициялық ынтымақтастықты дамыту перспективаларына ерекше назар аударылды.

Олар  саяси диалог пен экономикалық байланыстарды одан әрі кеңейтуге өзара ұмтылыстарын қуаттады. Атап айтқанда, бірлескен инвестициялық жобаларды жүзеге асыруға қызығушылық танытылды.

Соңында Тоқаев Әбу-Даби тақ мұрагерін 2022 жылы Қазақстанға ресми сапармен келуге шақырды.