Тоқаев БРИКС+ келіссөздерінде сөз сөйлейді

Ақорданың баспасөз қызметі осы аптада президенттің қатысуымен өтетін іс-шаралар туралы хабарлама жариялады. Бұл мемлекет басшысы БРИКС+ форматындағы Жаһандық даму жөніндегі жоғары деңгейдегі келіссөзде сөз сөйлейтінін білдіреді.

21 маусымда Мемлекет басшысы Ақордада Қазақстан шахмат федерациясының өкілдерімен және отандық танымал шахматшылармен кездесу өткізеді.

23 маусымда Қасым-Жомарт Тоқаев Қазақстан полициясының 30 жылдығына арналған салтанатты шараға қатысады.

24 маусымда Мемлекет басшысы ҚХР Төрағасы Си Цзиньпиннің шақыруымен өтетін бейнеконференция арқылы БРИКС+ форматындағы жаһандық даму жөніндегі жоғары деңгейдегі келіссөзде сөз сөйлейді.

БРИКС – бес мемлекеттен тұратын топ: Бразилия, Ресей, Үндістан, Қытай және Оңтүстік Африка.

22 мамырда Қытайдың БҰҰ жанындағы Тұрақты өкілі Чжан Цзюнь өзінің Twitter парақшасында Қазақстанды БРИКС+ мүшесі болуға шақырған жазба жариялады.

Қазақстаннан бөлек Сауд Арабиясы, Аргентина, Мысыр, Индонезия, Нигерия, Сенегал, Біріккен Араб Әмірліктері және Таиланд елдерін де шақырды.