Тоқаев Бердімұхамедовтың «жастарға жол беру» туралы бастамасын қолдады

Қазақстан президенті Қасым-Жомарт Тоқаев Түркіменстан президенті Гурбангулы Бердімұхамедовтың мерзімінен бұрын сайлау өткізу туралы бастамасын қолдады. Бұл туралы Ақорданың ресми сайты хабарлады.

Мемлекеттер басшылары екіжақты қарым-қатынастарды одан әрі нығайтудың перспективаларын, оның ішінде Қазақстан Президентінің былтырғы қазан айында Ашхабадқа жасаған мемлекеттік сапарының қорытындысы бойынша қол жеткізілген уағдаластықтардың іске асырылу барысын талқылады.

– Қасым-Жомарт Тоқаев Түрікменстан Президентіне шынайы құрметін білдіре отырып, Гурбангулы Бердімұхамедовтің кезектен тыс президент сайлауын өткізу жөніндегі шешімін қолдайтынын мәлімдеді. Қасым-Жомарт Тоқаевтың айтуынша, Түрікменстан басшысының саяси әрі өмірлік мол тәжірибесі осы мемлекеттің өркендеуіне септігін тигізері сөзсіз, - делінген хабарламада.