Тоқаев Қазақстанда конституциялық сот құруды ұсынды

Парламент палаталарының бірлескен отырысында президент Қасым-Жомарт Тоқаев Қазақстан халқына Жолдауын жариялады.

Қасым-Жомарт Тоқаев демократия тарихы туралы айта келе, байқаушылардың құқықтары мен жауапкершілігі туралы бастама көтерді.

– Демократия тарихы дегеніміз – ең алдымен, сайлау рәсімдерін жетілдіру тарихы. Сондай-ақ, сайлау заңнамаларының сақталуын бақылау тарихы деуге болады. Осы орайда, мен байқаушылардың құқықтары мен жауапкершілігі нақты белгіленуге тиіс деп санаймын, - деді мемлекет басшысы.

Сондай-ақ, президент Қазақстанда конституциялық сот құруды ұсынды. Тоқаевтың айтуынша, бұл әділ мемлекет құрудағы маңызды қадам болмақ.

– Мен елімізде Конституциялық сот құруды ұсынамын. Бас прокурор мен Адам құқығы жөніндегі уәкілге де Конституциялық сотқа жүгіну мүмкіндігін берген жөн. Бұл бастамалар әділ әрі құқықтық мемлекет құру жолындағы маңызды қадам болады деп сенемін, - деді президент.