Тоқаев Қауіпсіздік кеңесі отырысын өткізді

Мемлекет басшысының төрағалығымен Ақордада Қауіпсіздік кеңесі отырысы өтіп, онда ұлттық қауіпсіздік жүйесін қайта ұйымдастыру және нығайту шаралары қаралды.

Бұл туралы Ақорда сайтында жазылған.

Отырысты ашқан Қауіпсіздік кеңесінің төрағасы Қасым-Жомарт Тоқаев қазіргі уақытта елдегі жағдай толығымен тұрақтанғанын, заңдылық пен тәртіп орнағанын атап өтті. Жеке адамның, қоғамның және мемлекеттің қауіпсіздік деңгейін арттыру үшін барлық шаралар қабылданып жатқанын алға тартты.

Президент барлық мемлекеттік органдар сабақ алу керектігін атап өтті. Жаңартылған ұлттық қауіпсіздік жүйесі кез келген күрделіліктегі сын-қатерлерге төтеп беруге дайын болуы керек.

«Біз қылмыстық топтар мен лаңкестердің бұдан былай қалаларды басып алуына, азаматтар мен олардың отбасыларының бейбіт өміріне қол сұғуына, мемлекеттілікке қауіп төндірмеуі үшін шаралар қабылдауға міндеттіміз. Ұлттық қауіпсіздік жүйесін қайта конфигурациялау дәл осыған бағытталған» деді Қасым-Жомарт Тоқаев.

Қауіпсіздік Кеңесінің басшысы қауіпсіздікке жауапты барлық құрылымдар жұмысын өзгертуі, бұл ретте олардың өзара іс-қимылы мүмкіндігінше теңгерімді болуы керектігін атап өтті.

Мемлекет басшысы ұлттық қауіпсіздіктің барлық аспектілерін нығайту бойынша нақты шараларды дереу жүзеге асыруға кірісуді тапсырды. Қауіпсіздік кеңесінің отырысы барысында ұлттық қауіпсіздік жүйесін реформалауға бағытталған нақты шешімдер қабылданды.