Тоқаев Ауғанстандағы жағдайға байланысты жиын өткізді

Қазақстан президенті Қасым-Жомарт Тоқаев Ауғанстандағы жағдайға байланысты күштік құрылымдар басшыларының басын қосып, жиын өткізді.

Бұл туралы мемлекет басшысы өзінің Twitter парақшасында жазды, деп хабарлайды  Orda.kz.

— Ауғанстандағы жағдай бойынша күштік құрылымдардың басшыларымен жиын өткіздім. АИР-дағы азаматтарымыз бен дипломаттарымыздың қауіпсіздігін қамтамасыз ету жөнінде тапсырма бердім. Қазақстан Ауғанстандағы жағдайдың ушығып бара жатқанына алаңдаушылық білдіреді. Ахуал мұқият бақылауда, - деп жазды ел президенті.

Ауғанстаннан америкалық әскерилер шығарылғаннан кейін жағдай ушықты. Осыған байланысты бұйрықты АҚШ президенті Джо Байден сәуір айының ортасында берген. Тиісті бұйрық орындала бастағаннан кейін тәліптер Ауғанстанның бірқатар аймағын басып алды. НАТО жасағы мен америкалық әскерилердің соңы шілденің басында елден кетті.

Қазіргі күні Ауғанстандағы «талибан»  күшейіп келеді. Бұқаралық ақпарат құралдарындағы деректерге сәйкес, олар Иран, Қытай, Пәкістан, Тәжікстан мен Түркіменстан шекараларын қоса алғанда, ел аумағының 90 пайызын жаулап алды.