Тоқаев Қалжыр өзенінің ластануына кінәлілерді жазалауды тапсырды

Қазақстан президенті Қасым-Жомарт Тоқаев Шығыс Қазақстан облысындағы Қалжыр өзенінің ластануына кінәлілерді жазалауды бұйырды.

Бұл туралы Orda.kz хабарлады.

Мұндай ақпаратпен мемлекет басшысының баспасөз хатшысы Берік Уәли бөлісті.

– «Айқын» газетінің бүгінгі нөміріне «Қалжырды кім ластап жатыр?» деген мақала жарияланған еді. Онда Шығыс Қазақстан облысындағы Қалжыр өзенін заңсыз алтын өндірушілер қатты ластап жатқаны туралы өте өзекті мәселе көтерілген. Осыған байланысты Мемлекет басшысы Қасым-Жомарт Тоқаев Экология, геология және табиғи ресурстар министрлігі мен Шығыс Қазақстан облысының әкімдігіне аталған проблеманы егжей-тегжейлі тексеріп, кінәлілерді жауапкершілікке тарту туралы тапсырма берді, - деп жазды өзінің Facebook парақшасында.