Тоқаев Алматыдағы жол-көлік оқиғасын тергеуді өз бақылауына алды

54 жастағы мас жүргізуші УАЗ көлігімен жол жиегінде тұрған оқушы қыздарды қағып кеткен. Олардың екеуінің жағдайы ауыр.

Президент Қасым-Жомарт Тоқаев Алматы облысында мас жүргізуші төрт баланы басып кеткен жол-көлік оқиғасын тергеуді өз бақылауына алды. Бұл туралы мемлекет басшысының баспасөз хатшысы Берік Уәли хабарлады.

— Президент Алматы облысында мас жүргізуші төрт кішкентай қызды қағып кеткен оқиғаны тергеуді бақылауына алды. Олардың екеуі ауруханада ауыр халде жатыр. Мемлекет басшысы бұл жөнінде жан-жақты тергеу жүргізуді тапсырды. Жүргізуші заңға сәйкес жауапкершілікке тартылады. Қыздар мен олардың ата-аналарына көмек көрсетіледі, деп жазды Берік Уәли Facebook-те.

Полиция департаментінің айтуынша, апат 2 наурыз күні Қорам ауылында болған. 54 жастағы ауыл тұрғыны мас күйінде УАЗ автокөлігімен жолда тұрған 8 және 9 жастағы екі қызды қағып, құлатып кеткен.

Алған соққыдан түрлі дене жарақаттарымен үш бала Шелек аудандық ауруханасына жатқызылды. Бір қызға үйге баруға рұқсат етілді, ол ауыр жарақат алмады.

— Жол-көлік оқиғасы фактісі бойынша ҚР Қылмыстық кодексінің 345-бабы «Көлік құралдарын басқаратын адамдардың жол жүрісі немесе көлік құралдарын пайдалану ережелерін бұзуы» бойынша сотқа дейінгі тергеу басталды, деді полиция.