Тоқаев Алматы әкімі Сағынтаевты отставкаға жіберді

Президент Қасым-Жомарт Тоқаев 2019 жылдан бері Алматы әкімі қызметін атқарған Бақытжан Сағынтаевты лауазымынан босатты.

«Мемлекет басшысының Жарлығымен Бақытжан Әбдірұлы Сағынтаев Алматы қаласының әкімі лауазымынан басқа жұмысқа ауысуына байланысты босатылды» делінген Ақорда жариялаған хабарламада.

«Хабар 24» арнасына берген сұхбатында жүргізуші Вера Захарчук Тоқаевтан Сағынтаевтың отставкаға жіберу петициясы туралы пікірін сұрады.

– Ол шынымен де өте қиын жағдайға тап болды. Мұндай жағдайда бәрі бірдей шешім таба бермейді. Сондықтан мен оны кінәламас едім. Ол қызметтік міндеттерін орындау тұрғысынан адал адам, бірақ мен алматылықтардың көңіл-күйін ескеруге міндеттімін. Сондықтан уақыт келеді – сол кезде білесіз, – деді Тоқаев.

Бақытжан Сағынтаев 1963 жылы 13 қазанда дүниеге келген. 1985 жылы Киров атындағы Қазақ мемлекеттік университетін экономист мамандығы бойынша бітірген. Экономика ғылымдарының кандидаты.

Еңбек жолын Алматы халық шаруашылығы институты Саяси экономика кафедрасының оқытушысы болып бастады. Содан кейін Киров атындағы Қазақ мемлекеттік университетінде жұмыс істеді. Ассистенттен әлеуметтану кафедрасының доцентіне дейінгі жолдан өтті. Табиғи монополиялар саласын мемлекеттік реттеу, шағын және орта бизнесті дамыту тақырыбына арналған бірқатар ғылыми жұмыстардың, жарияланымдардың авторы.

Әр жылдары ол өзін бизнесмен және шенеунік ретінде сынап көрді. ҚР Табиғи монополияларды реттеу агенттігінің төрағасы болды. ҚР премьер-министрі кеңсесін басқарды. Павлодар облысының әкімі, экономикалық даму және сауда министрі болды.

2016 жылдың 9 қыркүйегінен 2019 жылдың 21 ақпанына дейін Бақытжан Сағынтаев премьер-министр қызметін атқарды.

2019 жылғы 1 наурызда мемлекеттік хатшы лауазымына ие болды. 24 наурыздан бастап ҚР президенті әкімшілігінің басшысы болып жұмыс істеді. 28 маусымда оның орнына Қырымбек Көшербаев келді.

2019 жылдың маусым айынан бастап Алматы қаласының әкімі.

Еске салсақ, бұған дейін Алматы тұрғындары Алматы әкімі Сағынтаевтың отставкаға кетуін талап еткен петиция жарыққа шықты. Желіде Алматы қаласының әкімі Бақытжан Сағынтаевтың отставкаға кетіп, орнына Бейбіт Атамқұловтың келе жатқаны туралы хабарлама тарады. Алматы әкімдігі бұл ақпаратты жоққа шығарған болатын.