Тоқаев қаңтар оқиғасының халықаралық тергеуіне қарсы

Қазақстан президенті Қасым-Жомарт Тоқаев Қазақстандағы қаңтар оқиғасы бойынша халықаралық тергеу жүргізудің қажеті жоқ деп санайды, өйткені тергеуді ел өзі жүргізе алады.

Ол сондай-ақ Еуропарламенттің Қазақстандағы оқиғаларға қатысты қарарын біржақты деп атады.

— Қазақстандағы оқиғаларға қатысты халықаралық тергеуге келетін болсақ, мұндай тергеу жүргізудің қажеті жоқ деп есептеймін. Өзіміз жасайық. Бізде адал, объективті адамдар бар, мен бүгін кейбіреулерін атадым, олар қоғамдық комиссияларды басқарады, - деді Тоқаев «Хабар» арнасына берген сұхбатында.

Сондай-ақ ол Еуропарламенттің Қазақстандағы оқиғаларға қатысты қарарын сабырлы қабылдағанын айтты.

— Қарар міндетті емес, бұл ұсынымдық резолюция. Олар Қазақстан туралы екінші рет резолюция қабылдап отыр. Мен өзім де шындықты білуге ​​мүдделімін, -деді президент.