Тоқаев 162 адам байлықтың жартысына ие екенін айтты

Президент Қасым-Жомарт Тоқаев халықтың жартысының табысы 50 мың теңгеден аспайтынын айтып, жағдайды тез арада өзгерту керектігін мәлімдеді.

Сондай-ақ, 2020 жылы ұлттық табыс құрылымында ең жоғары үлесті бизнестің кірісі – 61,5 пайыз алатынын атап өтті.

– Салықтың үлесі 7,3 пайызды құраса, қазақстандықтардың жалақысы үштен бір бөлігіне де жетпейді. Бұл өте аз. Мәселен, Ресейде экономиканың ұқсас құрылымына қарамастан, жалақы 46,7 пайызды құрайды, яғни біздің елмен салыстырғанда 1,5 есе көп.

– Бұл жерде теңгерімсіздік пен әділ бөлудің мәселесі бар. Байлықтың жартысы 162 адамға ғана тиесілі, ал халықтың жартысы табысы 50 000 теңгеден аспайтынын алға тартады. Бұл жылына 1300 доллардан сәл ғана асады. Мұндай ақшаға өмір сүру мүмкін емес, жағдайды шұғыл өзгерту керек, - деді мемлекет басшысы бизнес өкілдерімен кездесуінде.

Сонымен қатар, Президент Тоқаев байлар мен кедейлер арасындағы алшақтыққа жол беруге болмайтын деңгейге жеткенін мәлімдеді. Ол елдің экономикалық өсімінен шектеулі элиталық топтардың пайда көре бастағанын, ал көпшіліктің кірісі азайып немесе тоқырауда екенін атап өтті.