«Титушка емеспін». Боксшы Ыбрайымов депутат болды

Бокстан Сидней Олимпиадасының чемпионы Ермахан Ыбрайымов Алматы қаласы мәслихатының депутаты болды. Ол депутаттық мандатқа биліктегі «Нұр Отан» партиясының атынан ие болған.

Партия бекіткен тізімде Ермахан Ыбрайымовтан бөлек 28 адам бар.

Ыбраймов мәжіліс пен мәслихат сайлауы өткен 10 қаңтар күні Алматының орталық алаңында билікке қарсы наразылыққа шыққан бір топ азаматты «сабырға шақырушылардың» қатарында болған еді. Ол сол кезде белсенділердің плакатын жыртып, кейбірінің жағасына жабысқан. Ал наразы топ оған «Ермахан, сатқын" деп айқайлаған.

Боксшының осы әрекеті қоғамда өткір сынға ұшырады. Әлеуметтік желіде оны алаңға биліктің бұйрығымен арандату мақсатында барған «титушка» деп атағандар да болды. Ал Ыбрайымов Malim.kz cайтына берген сұхбатында өзінің «титушка» емес екенін және алаңға кездейсоқ барып қалғанын айтқан.