Тимур Құлыбаев Қазақстан билігіне 1 млрд доллар төлеуі мүмкін – Bloomberg

Назарбаевтың күйеу баласы олигарх Тимур Құлыбаев Қазақстан билігіне бір миллиард доллар төлеу жөнінде келіссөздер жүргізіп жатыр, деп хабарлайды Orda.kz.

Bloomberg дереккөздеріне сүйенсек, келісімге қол жеткізілсе, Құлыбаев қаржының бір бөлігін төлеп, екінші бөлігін елеулі жобаларға салуы керек. Бұл туралы шетелдік БАҚ-қа осы келіссөздердің барысымен таныс деген екі адам айтты. Алайда бұл ақпаратты растау мүмкін емес, өйткені дереккөздер құпия.

«Қазақстандағы ең бай адамдардың бірі алғашқы президент тұсында жинаған байлығына қатысты үкіметтік тергеу аясында мемлекетке шамамен бір миллиард доллар төлеуді талқылап жатыр» деп жазады басылым. 

Алдын ала мәлімет бойынша, егер Құлыбаев пен мемлекет арасындағы мәміле орындалса, бұл Қазақстан экс-президентінің күйеу баласын қандай да бір айып тағылып, оның қызметі мен мүмкіндігін асыра пайдаланғанына байланысты кінәсін мойындады дегенді білдірмейді.

Өткен қарашада Бас прокуратура жанындағы Активтерді қайтару комитеті Тимур Құлыбаевтың үстінен тағы да сотқа шағым түсіргені белгілі болды. Шамасы, Bloomberg жоғарыда айтылған айып деп осы шағымды ойлаған болуы мүмкін. Дегенмен, толық ақпарат алу қиын. Комитет Құлыбаевтың мүлкі туралы ақпаратты мемлекеттік құпия ретінде аса сақтықпен қорғайды.